Претседателот Стево Пендаровски во рамки на проектот „Лице в лице со претседателот“ денеска се сретна со Веселин Теохаров, еден од основачите на реномираната македонска компанија Теохаров Аудио.
Осврнувајќи се на своите почетоци, Веселин презентираше дел од уникатните компоненти и производи, со кои Теохаров Аудио повеќе од две децении е докажан бренд во производството на High End аудио опрема од висока класа. Тој истакна дека Теохаров Аудио е создавач на првата врвна хајфај македонска опрема, која е спој на наука, музика и уметност наменета за вистинските познавачи на квалитетниот звук.
Веселин го запозна претседателот и со концептот на нивниот салон Аудиокултура кој, освен комерцијалната, изложбена цел на нивни и на светски реномирани аудио брендови, претставува и урбано катче каде соединува музиката. Освен социјалната компонента, посетителите на Аудиокултура имаат можност, во префинето акустично опкружување, во потполност да го доживеат врвниот звук.
За време на посетата на Аудиокултура, претседателот Пендаровски ја разгледа и лабораторијата за истражување и развој, каде се преслушуваат различни аудио компоненти за споредба и за субјективно тестирање на нивните карактеристики.
Досега под брендот Теохаров се произведени над 100-тина модели на звучници, засилувачи и дистрибутери на сигнал, како и custom made аудио системи, за повеќе од 50 клиенти кај нас и во регионот. Покрај стандардните линии, асортиманот на Теохаров е збогатен со уште едно, исклучително значајно дело, системот Legendary. Тој е плод на соработката и пријателството со Влатко Стефановски. Производот е конструиран според врвните инженерски преференци на Теохаров и префинетиот музички сензибилитет на Влатко Стефановски.





