Во рамки на активноста Отворен кабинет денеска Кабинетот на претседателот го посетија ученици од средните училишта: СУГС „Шаип Јусуф“, СУГС Марија Склодовска Кири и СУГС Лазар Танев коишто учествуваат во Програмата за младински лидери од маргинализирани заедници, чија цел е развој и унапредување на лидерството во граѓанското општество во Северна Македонија.
Посетителите имаа можност да се сретнат со претседателот Пендаровски и да разговараат за нивните идни образовни планови и професионални определби, а ги споделија и своите искуства од досегашната реализација на петте проекти во рамки на програмата, насочени во неколку социјални области.
Претседателот Пендаровски ја поздрави нивната проактивност, изразувајќи уверување дека ваквите заложби имаат важен позитивен придонес во општествените процеси.
За време на престојот во Кабинетот, учениците имаа можност и да присуствуваат во просториите во коишто се реализираат официјалните и работните средби, во салите во коишто се одржуваат состаноци, свечености, настани и прес-конференции, како и да го разгледаат импозантниот диптих „Македонија – светла земја“ и „Македонија памети“ на авторот – академик Глигор Чемерски, поставен на двата ѕида во Мозаик салата.





