Обраќање на претседателот Пендаровски на приемот по повод 21 Декември, Денот на наставата на турски јазик во организација на МАТУСИТЕБ

21 декември 2023 | Соопштенија

Претседателот Стево Пендаровски денеска се обрати на приемот што по повод 21 Декември, Денот на наставата на турски јазик го приреди Сојузот на турски невладини организации во Македонија – МАТУСИТЕБ.

Во продолжение е интегралниот текст од обраќањето на претседателот Пендаровски.

Почитувани присутни,
Драги сограѓани,

Ми претставува голема чест да ве поздравам и да ви го честитам 21 Декември – Денот на наставата на турски јазик. Им благодарам на раководството на Сојузот на турски невладини организации во Северна Македонија – МАТУСИТЕБ за поканата да ви се обратам на овој празник на турската заедница.

Една од првите одлуки на асномска Македонија, била да се овозможи настава на мајчин јазик за повеќе заедници, вклучително и за турската. Така, на денешен ден, во 1944 година започнала наставата на турски јазик во скопското училиште „Тефејуз“. Со оваа одлука беше ослободен клучниот креативен потенцијал на овој народ, преку чување на својот идентитет и развивање на својата култура да придонесува за општото добро. Набргу наставата се прошири и во другите краишта на државата каде што со векови живеат Турците, од Гостивар до Дојран, од Куманово до Охрид.

Но, корените на денешниов празник на турската заедница во Северна Македонија ѝ претходат не само на современата македонска држава, туку и на современата турска држава. Инаку, низ вековите, турската заедница во Македонија дала многу големи личности, меѓу кои најголемиот е основачот на модерна Турција – Мустафа Кемал Ататурк, чија семејна куќа се наоѓа во селото Коџаџик.

Годинава се одбележуваат 100 години од основањето на Република Турција и 95 години од јазичните реформи и воведувањето на новата турска азбука. Познато е дека последните години од својот живот, Ататурк ги посветил токму на реформите во образованието. Тој верувал дека од образованието зависи дали една нација ќе биде вистински независна и просперитетна или, пак, ќе тоне во зависност и сиромаштија. Тој велел: за да се одбрани државата е потребна армија, но, за да се одбрани слободата, потребно е образование. Затоа, слободното општество мора да биде образовано општество во кое секој ќе има еднаков пристап до знаењето.

Ататурк го споредувал добриот учител со свеќа што согорува за да им го осветли патот на другите. И навистина, со него започнува новата епоха во образованието на турски јазик што за кратко време доведе до масовно описменување на Турците, не само во Република Турција, туку и во дијаспората, вклучително и тука, кај нас.

Ценети присутни,

Големиот турски поет и филозоф Јунус Емре, рекол: „Дојдете да се запознаеме, да сакаме и да бидеме сакани. Овој свет нема да остане на никого“. Во овој повик ја препознаваме парадигмата на соживотот меѓу различните кои меѓусебно се почитуваат, наместо да се исклучуваат, а вредностите ги споделуваат, наместо да ги присвојуваат за себе.

Тоа што сме различни е наша најголема вредност. Секоја заедница, вклучително и турската, дава уникатен придонес кон изградбата и развојот на нашата заедничка татковина. Образованието пак на турски јазик придонесува кон одржување на турскиот идентитет, култура и традиција и со тоа кон збогатување на соживотот во македонското мултиетничко, мултијазично и мултирелигиско општество.

Наспроти предизвиците во образованието и во другите области, претставниците на турската заедница во Македонија даваат голем придонес во секоја сфера, во просветата, науката, здравството, уметноста и спортот. Некои од нив со гордост ја претставуваат нашата држава на меѓународните средби и натпревари. Затоа, државата мора да ги отстрани и последните пречки за нашите сограѓани Турци да можат без никаков проблем да го остваруваат ова основно човеково право на образование, за да се чувствуваат како целосно рамноправни граѓани.

Освен што со својата лојалност придонесува за поголема кохезија во македонското општество, турската заедница претставува и силна врска со пријателска Турција. А ефектите на тоа пријателство се одличните билатерални односи и заемната поддршка, бројните инвестиции, заедничките проекти, донациите во образованието, науката, здравството и културата.

Посакувам таа соработка да продолжи да се збогатува со нови содржини и во иднина.

Драги пријатели,

На самиот крај би сакал да му го честитам 20-годишниот јубилеј на МАТУСИТЕБ и да ви посакам многу успех во реализација на вашите визии. Ја користам оваа прилика, вам и на сите припадници на турската заедница да ви го честитам 21 Декември – Денот на наставата на турски јазик. Нека е за многу години овој голем празник.

Eğitim bayramınız kutlu olsun!

Категории

Categories

Kategori

Последни вести

Latest news

Lajmet e fundit

Порака од претседателот Пендаровски по повод Денот на македонскиот јазик

Порака од претседателот Пендаровски по повод Денот на македонскиот јазик

По повод 5 Мај – Денот на македонскиот јазик, претседателот Стево Пендаровски ја упати следната порака: Почитувани сограѓани, Нека ни е честит 5 Мај – Денот на македонскиот јазик. Пред точно 79 години беше озаконета македонската азбука со што континуираниот развој на...

Честитка од претседателот Пендаровски по повод големиот христијански празник Воскресение Христово – Велигден

Честитка од претседателот Пендаровски по повод големиот христијански празник Воскресение Христово – Велигден

© Фото: Кристијан Георгиевски Претседателот Стево Пендаровски, по повод големиот христијански празник Воскресение Христово – Велигден, упати честитка до поглаварот на Македонската Православна Црква – Охридска Архиепископија, митрополит скопски, архиепископ охридски и...

Претседателот Пендаровски на одбележување на 121-годишнината од смртта на Гоце Делчев

Претседателот Пендаровски на одбележување на 121-годишнината од смртта на Гоце Делчев

Претседателот Стево Пендаровски денеска положи свежо цвеќе на гробот на македонскиот револуционер Гоце Делчев во црквата „Свети Спас“ во Скопје, по повод 121-годишнината од неговата...

Порака од претседателот Пендаровски по повод 3 Мај − Светскиот ден на слобода на медиумите

Порака од претседателот Пендаровски по повод 3 Мај − Светскиот ден на слобода на медиумите

Претседателот Стево Пендаровски по повод 3 Мај − Светскиот ден на слобода на медиумите, ја упати следната порака: „Слободата на медиумите е еден од темелите на демократските вредности и е од суштинско значење за демократскиот развој на македонското општество....

Порака од претседателот Пендаровски по повод 1 Мај, Денот на трудот

Порака од претседателот Пендаровски по повод 1 Мај, Денот на трудот

По повод 1 Мај, Денот на трудот, претседателот Стево Пендаровски ја упати следната порака: „Човечкиот е најскапоцениот ресурс за секоја држава. Фактот дека голем дел од развиените демократии денес се соочуваат со недостиг на работна сила, е аларм за сите нас дека...