Генералниот секретар на Кабинетот на претседателот Миле Бошњаковски, денеска прими делегација предводена од заменик – министерот за надворешни работи на Јапонија, Јоичи Фуказава, којашто престојува во земјава по повод учеството на Министерски совет на ОБСЕ.
На средбата беше изразено задоволство од позитивниот тренд во развојот на билатерални односи меѓу двете земји, кои идната година ќе одбележат 30 годишнина од воспоставување на дипломатските односи и беше изразена подготвеност за натамошно унапредување на севкупната билатерална и мултилатерална соработка.
Бошњаковски се заблагодари за техничката помош и донациите од Јапонија во повеќе клучни области во земјава, како и за помошта од јапонската Влада за време на пандемијата на Ковид-19.
На средбата беше изразена подготвеност за продлабочување на економската соработка, споделување на искуства и натамошно зближување на двете земји, преку развој на соработката во сферата на културата, образованието и туризмот.
Во контекст на Министерскиот совет на ОБСЕ, беа поздравени активностите и ангажманот на Северна Македонија како претседавач со организацијата. Со оглед на променетите геополитички состојби, соговорниците разменија информации за поширокото влијание од руската инвазија врз Украина и економските и безбедносни последици.





