Претседателот Стево Пендаровски денеска го прими 12 годишниот Ајдин Османовиќ, од Сребреник, Босна и Херцеговина, кој фасцинира со изведбата на македонски традиционални песни.
Зборувајќи за љубовта кон музиката и кон традиционалната македонска музика, Ајдин истакна дека не му е тешко да пее на македонски јазик, иако не е негов мајчин јазик. На своите солистички концерти, покрај македонски, тој пее и традиционални босански песни. Неговиот професор и ментор Јасмин Брашњиќ, кој постојано го придружува Ајдин, истакна дека важно е да се негува и да се доближи традицијата до помладата генерација.
На денешната средба Ајдин воодушеви пеејќи ја „Зајди Зајди“. Истакнувајќи дека волшебниот глас на Ајдин е надополнет со неговата волшебна насмевка, претседателот Пендаровски рече дека Ајдин поседува талент кој несомнено ќе му донесе големи успеси.
Ова е втора посета на Ајдин на нашата земја. Во мај годинава, тој имаше солистички концерт во Крива Паланка. Сега престојува во државата, повторно на покана на градоначалникот Сашко Митовски, а поводот е одлуката на општина Крива Паланка да се збратими со Сребреник, родниот град на талентираниот Ајдин Османовиќ.





